Окуу китептеринин базарларда сатылып жатышынын мыйзамдуулугу текшерилет
Мектептерде окуу китептери жетишсиз болуп жаткан учурда, базарларда сатылып жаткандыгы тууралуу Жогорку Кеңештин депутаты Дастан Бекешевдин кайрылуусу боюнча бүгүн Агартуу министрлигинде жолугушуу болуп өттү.
Жолугушууга Агартуу министринин орун басары Надира Джусупбекова, “Окуу китеби” басма үйү” мекемесинин директору Төлөгөн Аматов, “Учкун” ААКтын жетекчиси Бакытбек Султанов жана Жогорку Кеңештин депутаты Дастан Бекешев катышты.
Аталган мекеменин маалыматына караганда, жолугушууда тараптар мектептер үчүн басылып чыга турган ар бир окуу китебине QR-код жайгаштыруу маселесин талкуулашты. QR-код окуу китептеринин кыймылын көзөмөлдөөгө, тактап айтканда, китептин кайсы аймакка, мектепке жана класска берилгендиги тууралуу маалыматты аныктоого мүмкүнчүлүк берет.
Ошондой эле QR-код аркылуу окуучулар жана мугалимдер окуу китебинин мазмунуна байланыштуу кошумча электрондук материалдарга жана санариптик ресурстарга жетүү мүмкүнчүлүгүнө ээ болушат.
Мындан тышкары, окуу китептерин басып чыгарууга каралган каражаттарды каржылоо жана бул багыттагы иштерди колдоо маселелери талкууланды. Жогорку Кеңештин депутаты Дастан Бекешев окуу китептерин басып чыгарууга зарыл болгон каражат маселесин чечүүгө көмөк көрсөтүүгө даяр экенин билдирди.
Мындан сырткары, Адылбек Касымалиевдин тапшырмасы боюнча укук коргоо органдары өлкө базарларында мектеп окуу китептерин сатуу фактылары боюнча текшерүүнү баштады. Текшерүүнүн жыйынтыгы боюнча мыйзамдарда белгиленген тартипте тиешелүү чаралар көрүлмөкчү.
