Ошто "Мугалим PRO" долбооруна 35 жаш педагог тандалды

Ош шаарында 35 жашка чейинки жаш мугалимдердин кесиптик, санариптик жана лидерлик сапаттарын өнүктүрүүгө багытталган "Мугалим PRO" долбоору кайрадан башталды. Бул тууралуу мэриянын басма сөз кызматы кабарлады.

Долбоорго катышуу үчүн 300гө жакын жаш адис кызыгуу билдирген. Эки этаптуу тандоонун - онлайн-тандоо жана маектешүүнүн жыйынтыгында 35 мыкты педагог тандалып алынды.

Алты айга эсептелген долбоордун жыйынтыгында мыкты катышуучулардын арасынан эки мугалимге чет өлкөдө кыска мөөнөттүү тажрыйба алмашуу жана кесиптик өнүгүү мүмкүнчүлүгү берилет.

Долбоор Ош шаардык мэриясынын маданият жана жаштар башкармалыгы менен билим берүү башкармалыгы тарабынан ишке ашырылууда. Анын негизги максаты - заманбап билим берүү талаптарына жооп берген, демилгелүү жана жаңыча ой жүгүрткөн жаш педагогдордун жаңы муунун калыптандыруу.