Ошто заманбап падл спорт борборунун курулушу башталды
Ош шаарындагы Сай-Бою көчөсүндө заманбап падл спорт борборунун курулушуна мезгил кутусу салынды. Иш-чарага Ош шаарынын мэри Жанарбек Акаев жана Ош шаардык кеңешинин төрагасы Болотбек Баетов катышты. Бул тууралуу мэриядан билдиришти.
Долбоордун жалпы аянты 3 300 чарчы метрди түзүп, инвестициянын көлөмү 1,5 млн долларды түзөт. Борбор толугу менен жабык форматта курулат. Курулуш эки этап менен жүргүзүлүп, биринчи этапка 500 миң доллар инвестиция тартылып, аны эки айда бүткөрүү пландалууда. Экинчи этап үч айга созулат.
Спорт борборунда жалпысынан 10 падл корту болот. Анын сегизи төрт адамдан, экөө эки адамдан ойноого ылайыкташтырылат. Мындан тышкары, борбордо тренерлер үчүн бөлмөлөр, кабыл алуу бөлүмү, намазкана, кийим алмаштыруучу жайлар, душ, санитардык түйүндөр жана кофе-бар каралган.
Падл - тенниске окшош, бирок көлөмү кичирээк кортто атайын ракетка жана топ менен ойнолуучу спорттун түрү. Оюн негизинен жуп болуп өткөрүлөт. Падл дүйнөдө акыркы жылдары кеңири жайылып, активдүү эс алуунун популярдуу түрүнө айланып жатат.
Эске салсак, мэр Жанарбек Акаев апрель айында Сай-Бою көчөсү келечекте спорттук шаарчага айланарын билдирген.
