Садыр Жапаров Корея менен экономикалык өнөктөштүктү күчөтүүгө чакырды
Президент Садыр Жапаров 16-сентябрда Корея Республикасына расмий сапарынын алкагында Сеул шаарында өткөн "Борбордук Азия - Корея Республикасы" биринчи саммитинде сөз сүйлөдү. Бул тууралуу президенттин администрациясы билдирди.
Мамлекет башчысы Борбордук Азия өлкөлөрүнүн ортосундагы өз ара ишеним жана аймактык кызматташтык күчөп жатканын белгилеп, Корея Республикасын аймактын ишенимдүү өнөктөшү деп атады. Ал соода, инвестиция, транспорт, энергетика, санариптештирүү жана билим берүү тармактарындагы кызматташтыкты кеңейтүүнүн маанилүүлүгүнө токтолду.
"Азыркы этаптагы негизги милдет - жогорку саясий ишенимди узак мөөнөттүү экономикалык жана технологиялык өнөктөштүккө өткөрүү", - деди Садыр Жапаров.
Президент экономикалык кызматташтыкты күчөтүү үчүн биргелешкен инвестициялык фонд түзүүнү, маанилүү долбоорлордун бирдиктүү портфелин калыптандырууну жана кореялык бизнестин Борбордук Азия рынокторуна чыгуусуна шарт түзүүнү сунуштады.
Ошондой эле жасалма интеллект жана санариптештирүү боюнча биргелешкен технологиялык аянтчаларды түзүү, таза энергетика, гидроэнергетика жана "жашыл" мобилдүүлүк багыттарында кызматташууну кеңейтүү демилгесин көтөрдү.
Мындан тышкары билим берүү, академиялык алмашуу жана биргелешкен изилдөөлөрдү өнүктүрүүнүн маанилүүлүгүн белгиледи. Мамлекет башчысы катышуучуларды 2027-жылы өтө турган "Бишкек+25" Глобалдык тоо саммитине чакырды.
"Саясий эркти иш жүзүндөгү жетишкендиктерге айландыруу зарыл", – деп сөзүн жыйынтыктады президент.
