Садыр Жапаров Кореянын президенти Ли Чжэ Мён менен сүйлөшүүлөрдү өткөрдү
Президент Садыр Жапаров бүгүн Сеул шаарында Кореянын президенти Ли Чжэ Мён менен сүйлөшүүлөрдү өткөрдү. Жолугушууда эки тараптуу күн тартибиндеги актуалдуу маселелер талкууланып, кызматташтыкты кеңейтүүнүн келечектүү багыттары белгиленди.
Президенттин администрациясы билдиргендей, Ли Чжэ Мён Кыргызстандын мамлекет башчысын жылуу тосуп алып, 1992-жылы дипломатиялык мамилелер түзүлгөндөн бери эки өлкөнүн байланышы ар түрдүү тармактарда өнүгүп келе жатканын белгиледи. Ал Кыргызстан менен Кореянын өз ара байланыштарын жана алмашууларын мындан ары кеңейтүүгө кызыкдар экенин билдирди. Ошондой эле Кыргызстанды БУУнун Коопсуздук Кеңешинин туруктуу эмес мүчөлүгүнө шайланышы менен куттуктады.
Садыр Жапаров Кореяны Азия-Тынч океан аймагындагы артыкчылыктуу өнөктөштөрдүн бири катары карай турганын айтып, эки өлкөнүн ортосунда саясий пикир келишпестиктер жок экенин белгиледи. Анын айтымында, эл аралык жана аймактык күн тартибиндеги бир катар маселелер боюнча позициялардын жакындыгы кызматташтыкты өнүктүрүүгө шарт түзөт.
Сүйлөшүүлөрдө биргелешкен медициналык борбор түзүү, визалык режимди жеңилдетүү механизмдерин кароо жана кыргыз товарларын Корея рыногуна чыгаруу маселелери көтөрүлдү. Мындан тышкары, инвестициялык агенттиктердин кызматташтыгын күчөтүү жана инфраструктуралык долбоорлорду ишке ашыруу боюнча пикир алмашуу болду.
Жолугушуунун соңунда тараптар кыргыз-корей стратегиялык өнөктөштүгүн мындан ары бекемдөөгө өз ара кызыкдар экенин ырасташты. Садыр Жапаров Ли Чжэ Мёнду 2027-жылы эки өлкөнүн дипломатиялык мамилелеринин 35 жылдыгына карата Кыргызстанга расмий сапар менен келүүгө чакырды.
