Ысык-Атада жаңы медициналык объектилер ачылды
15-сентябрда Ысык-Ата районунун Жалпы дарыгерлик практика борборунда жаңы медициналык объектилер ачылды. Ачылыш аземине Саламаттык сактоо министри Дамир Осмонов катышты. Бул тууралуу министрликтин маалымат кызматы кабарлады.
Анын алкагында үй-бүлөлүк дарыгерлер тобунун (ҮДТ) жаңы имараты, тез медициналык жардам кызматынын имараты, сейил бак жана балдар аянтчасы пайдаланууга берилди. Жаңы объектилер Кант шаарынын тургундары үчүн медициналык жардамдын жеткиликтүүлүгүн жана сапатын жогорулатууга багытталган.
Министр Дамир Осмонов биринчи медициналык-санитардык жардам деңгээлинде оорулардын алдын алуу, аларды эрте аныктоо жана калктын ден соолугуна кам көрүү маанилүү экенин белгиледи. Анын айтымында, бул багытты бекемдөө калктын ден соолугун жакшыртууга жана өмүрдүн узактыгын жогорулатууга өбөлгө түзөт.
Учурда Ысык-Ата ЖДПБнын курамында 21 үй-бүлөлүк дарыгерлер тобу жана 35 фельдшердик-акушердик пункт иштейт. Мекеме 220 миңден ашуун калкка медициналык кызмат көрсөтөт. Жаңы ҮДТ алгачкы медициналык-санитардык жардам көрсөтүүгө кошумча шарт түзсө, тез жардам кызматынын жаңы имараты медициналык жардамды ыкчам көрсөтүүгө мүмкүнчүлүк берет.
Мындан тышкары, борбордун аймагында сейил бак жана балдар аянтчасы да түзүлүп, бейтаптар жана алардын жакындары үчүн шарттар жакшыртылды. Долбоорду ишке ашырууга "Smart Generation" коомдук фонду салым кошкон. Министр фонддун президенти Мохаммад Абед Эль Жажиге колдоосу үчүн ыраазычылык билдирди.
