Быйыл китептерге 760 млн сом бөлүндү
Министрлер кабинетинин төрагасы Адылбек Касымалиев мектептерди окуу китептери, жумушчу дептерлер жана методикалык колдонмолор менен камсыздоо боюнча кеңешме өткөрдү. Бул тууралуу министрлер кабинетинен билдиришти.
Жыйында 12 жылдык билим берүүгө өтүү алкагында китептерди басып чыгаруу жана жеткирүү маселеси каралды. Ар бир окуу жылы үчүн класстарга этап-этабы менен китеп чыгаруу планы иштелип чыккан.
Маалыматка караганда, 2025-жылы китеп басууга 855 млн сом жумшалып, 4 млн 735 миң даана окуу комплекси мектептерге жеткирилген. 2026-жылы бюджеттен 744 млн сом, кошумча Агартуу министрлигинен 16,2 млн сом бөлүнгөн. Бул каражатка 3 млн 668 миң даана китеп чыгаруу пландалып, анын 2 млн 455 миң даанасы жеткирилди, 1 миллиондон ашууну жеткирүү баскычында.
Касымалиев окуучуларды китеп менен камсыздоо артыкчылыктуу экенин белгилеп, китептердин базарларда эркин сатылып жатканы боюнча укук коргоо органдары текшерүү жүргүзүп жатканын, жыйынтыгында катаал чара көрүлөрүн айтты. Президенттин чечими менен керектүү каражат бөлүнөрүн кошумчалады.
Жыйынтыкта Агартуу министрлигине китептерди даярдоону тездетүү, көзөмөлдү күчөтүү жана ай сайын мониторинг жүргүзүү тапшырылды.
