Адылбек Касымалиев Ханчжоуда Дүйнөлүк санариптик соода көргөзмөсүнүн ачылышына катышты
Бүгүн министрлер кабинетинин төрагасы Адылбек Касымалиев Кытай Эл Республикасына болгон жумушчу сапарынын алкагында Ханчжоу шаарында бешинчи Дүйнөлүк санариптик соода көргөзмөсүнүн ачылыш аземине катышты. Бул тууралуу министрлер кабинетинен билдиришти.
Өз сөзүндө министрлер кабинетинин башчысы санариптик соода дүйнөлүк сооданын жөн гана дагы бир багыты эмес, ал дүйнөлүк экономиканын жаңы инфраструктурасына айланып бара жатканын белгиледи.
Ал Кыргызстан Кытайдын жасалма интеллект жаатында кызматташуу боюнча Дүйнөлүк уюмду түзүү демилгесин кубаттай турганын билдирди.
"Биз үчүн өзгөчө маанилүүсү, Кыргызстан бул жаңы эл аралык түзүмдүн алгачкы мамлекет-негиздөөчүлөрүнүн бири болду. Биз жасалма интеллект өнүгүүгө кызмат кылып, санариптик ажырымды кыскартып, бардык өлкөлөргө жаңы мүмкүнчүлүктөрдү беришин каалайбыз. Кыргызстан бул ишке жигердүү катышууга даяр", - деди ал.
Адылбек Касымалиев санариптик соода жаатында кызматташуунун бир катар багыттарын белгиледи. Алардын катарында электрондук сооданын мүмкүнчүлүктөрү, Кытай-Кыргызстан-Өзбекстан темир жол долбоорун санариптик коштоп жүрүү бөлүгүндө санариптик логистика, санариптик төлөмдөр, чакан жана орто бизнес үчүн ЖИ-чечимдерин киргизүү, ошондой эле дата-борборлорду, технологияларды трансфертөө борборлорун биргелешип өнүктүрүү жана адистерди даярдоо бар.
"Биздин деңизге чыгуу мүмкүнчүлүгүбүз жок, бирок санариптик дүйнөдө аралык тоскоолдук болуп саналбайт. Кыргызстан инвестицияларга жана технологиялык өнөктөштүккө ачык. Жасалма интеллект жана санариптик соода дүйнөнү абдан тез өзгөртүүдө. Биздин милдет - аларды элдерибиздин жыргалчылыгы үчүн пайдалануу", - деди сөзүнүн аягында министрлер кабинетинин башчысы.
