Адылбек Касымалиев Ханчжоуда Малайзиянын Премьер-министри менен жолугушту

Министрлер кабинетинин төрагасы Адылбек Касымалиев КЭРдин Ханчжоу шаарына жумушчу сапарынын алкагында Малайзиянын Премьер-министри Анвар Ибрагим менен жолугушту. Бул тууралуу мекеменин басма сөз кызматы кабарлады.

Маалымдалганда, жолугушуу бешинчи Дүйнөлүк санариптик соода көргөзмөсүнүн аянтчасында өттү.

Тараптар 2024-жылы Анвар Ибрагимдин Кыргызстанга жана 2025-жылы президент Садыр Жапаровдун Малайзияга расмий сапарларын белгилеп, жетишилген макулдашууларды практикалык ишке ашыруунун маанилүүлүгүн баса белгилешти.

Жолугушууда кыргыз-малайзия кызматташтыгын өнүктүрүү, соода-экономикалык, инвестициялык жана маданий-гуманитардык чөйрөлөрдө өз ара аракеттенүүнү арттыруу келечеги талкууланды.

Касымалиев өткөн жылы эки өлкө ортосундагы соода жүгүртүү дээрлик алты эсеге өскөнүн белгилеп, сооданы диверсификациялоо жана кеңейтүү үчүн кошумча мүмкүнчүлүктөрдү биргелешип кароону сунуштады. Ошондой эле Атайын кыргыз-малайзия биргелешкен комиссиясынын ишин жандандырууну сунуштады.

Өз кезегинде Анвар Ибрагим өз ара кызыкчылык туудурган бардык багыттар боюнча кызматташтыкты мындан ары чыңдоого даяр экенин билдирди.