Адылбек Касымалиев Кытайда Geely компаниясынын жетекчилиги менен жолугушту
Министрлер кабинетинин төрагасы Адылбек Касымалиев Кытайга болгон жумушчу сапарынын алкагында Ханчжоу шаарында бизнес коомчулугунун өкүлдөрү менен жолугушууларды өткөрдү. Бул тууралуу мекеменин маалымат кызматы кабарлады.
Министрлер кабинетинин башчысы Geely Auto Group компаниясынын башкы кеңсесине барып, жетекчилиги менен сүйлөшүүлөрдү жүргүздү. Делегацияга корпорациянын техникалык мүмкүнчүлүктөрү, миссиясы жана потенциалы тааныштырылды.
Маалымдалгандай, жолугушууда тараптар кызматташтыкты өнүктүрүүгө кызыкдар экенин тастыктап, Кыргызстанда биргелешкен ишкана ачуу жана тейлөө инфраструктурасын өнүктүрүү мүмкүнчүлүгүн кароого даяр экенин билдиришти. Жыйынтыгында биргелешкен жумушчу топ түзүү макулдашылды.
Белгилей кетсек, Geely портфелине Geely, Lynk & Co, Zeekr, Volvo, Polestar, Proton жана Lotus бренддери, беш илимий-изилдөө борбору жана дүйнө жүзү боюнча ондон ашык өндүрүштүк база кирет. Сатуу тармагы 100дөн ашык өлкөнү камтыйт.
Ошондой эле сапардын алкагында социалдык объектилерди куруу, коммуникация, логистика жана банк-каржы секторунда кызматташтык перспективалары талкууланды.
