Бишкек шаарынын мэри Фрунзе көчөсүндөгү курулуш маселеси боюнча тургундар менен жолугушту
Бишкек шаарынын мэри Айбек Джунушалиев бүгүн Фрунзе көчөсү, 282а дарегиндеги мурдагы №116 бала бакчанын ордунда көп функционалдуу комплекс куруу маселеси боюнча тургундар менен жолугушту. Анда тургундар курулуштун коопсуздугуна, курулуш нормаларынын сакталышына, ошондой эле ага чектеш аймактарды, жашыл зоналарды, турак үйлөрдү жана балдар аянтчасын сактап калууга байланыштуу маселелерди көтөрүштү.
Тургундардын өтүнүчү боюнча мэр шаардык кызматтарга эс алуу зонасын жана воркаут аянтчасын уюштуруу маселесин карап чыгууну, ошондой эле бардык зарыл болгон курулуш талаптарынын сакталышын, айрыкча жакын жайгашкан үйлөрдүн коопсуздугуна өзгөчө көңүл буруу менен текшерүүнү тапшырды.
Мэриянын маалыматына ылайык, учурда бул райондо 8 мамлекеттик жана 10 жеке бала бакча иштейт.150 орунга ылайыкталган мурдагы №116 бала бакча жеке менчикке өткөрүлүп берилип, 1995-жылдан бери иштебей келет.
Инвестициялык долбоордун алкагында курулуш компаниясы өз каражатынын эсебинен муниципалитет сунуштаган башка жер тилкесине кеминде 500 орундуу жаңы бала бакча курат. Курулуш аяктагандан кийин объект муниципалдык менчикке өткөрүлүп берилет.
Айбек Джунушалиев шаар өнүгө турганын, бирок ар бир курулуш иши мыйзам талаптарын так сактоо менен жүргүзүлүп, коопсуздук камсыздалышы жана тургундардын мыйзамдуу кызыкчылыктары эске алынышы керектигин белгиледи.
Жолугушуунун жыйынтыгында мэр курулуш компаниясына белгиленген талаптарды сактоону, ал эми жооптуу шаардык кызматтарга алардын аткарылышын көзөмөлдөөнү тапшырды.
