Бишкекте айдоочуларга эмгек акы төлөөнүн жаңы эрежеси кирет
Бишкек шаарынын мэри Айбек Жунушалиевдин тапшырмасы менен "Бишкек шаардык транспорт" муниципалдык ишканасында бригадирлер менен жумушчу жолугушуу өттү. Бул тууралуу мэриянын басма сөз кызматы кабарлады.
Маалым болгондой, анда айдоочулардын эмгек акысын төлөөнүн жаңы системасын киргизүү маселеси каралды.
Жаңы системага ылайык, эмгек акынын өлчөмү белгиленген эмгек талаптарынын аткарылышына, жумуш убактысынын нормасынын сакталышына жана иштин сапатына жараша аныкталат.
Тактап айтканда, айдоочуга карата даттануу түшүп, анын негиздүүлүгү тастыкталса, эмгек акы 20%га чейин азайтылышы мүмкүн. Ошондой эле белгиленген жумуш убактысынын нормасы аткарылбаган учурда төлөм азайтылат.
Жолугушууда бригадирлерге жаңы системаны колдонуу тартиби жана эмгек акыга таасир этүүчү критерийлер түшүндүрүлдү. Мындан тышкары, айдоочулардын кыймыл графигин сактоосу, эмгек тартиби жана жүргүнчүлөрдү тейлөөнүн сапаты талкууланды.
Жаңы система айдоочулардын жоопкерчилигин жогорулатууга жана борбор калаада жүргүнчүлөрдү ташуунун сапатын жакшыртууга багытталган.
