Бишкекте экологиялык жылытууга 6%дык насыя берилет
Борбор калаанын тургундары экологиялык таза жана энергияны үнөмдөөчү жылытуу системаларына өтүүгө кызыгуу артууда. Бул тууралуу Жаратылыш ресурстары министрлиги билдирди.
"Кыргыз Республикасында абанын сапатын жакшыртуу" долбоорунун алкагында Бишкек шаарынын Биринчи май районундагы №108 орто мектепте маалыматтык жолугушуу өттү. Ага жергиликтүү тургундар катышты.
Маалымдалгандай, жолугушууда катышуучуларга экологиялык таза жылытуу системаларын сатып алууга жана орнотууга берилүүчү мамлекеттик жеңилдетилген насыянын шарттары тууралуу маалымат берилди.Тургундардын суроолоруна Финансы министрлигине караштуу Кредиттик линияларды башкаруу бөлүмүнүн жана Жаратылыш ресурстары, экология жана техникалык көзөмөл министрлигинин өкүлдөрү жооп беришти.
Катышуучуларды насыя алуу шарттары, насыя алуучуларга коюлган талаптар, ошондой эле каржыланууга тийиш болгон чыгымдардын тизмеси кызыктырды.
Иш-чаранын жүрүшүндө жылуулук насосторун жеткирүүчү компаниянын өкүлү жабдуулардын баасы, артыкчылыктары, иштөө принциби, орнотулушу жана техникалык тейлөөсү тууралуу айтып берди. Электр энергиясын берүүдө чектөөлөр болгон учурда жылуулук насосторунун иштөө өзгөчөлүктөрүнө өзгөчө көңүл бурулду.
Ошондой эле катышуучуларга жылуулук насосторун орнотуп, үйлөрүн жылытуу үчүн колдонуп жаткан үй-бүлөлөрдүн тажрыйбасы камтылган видеороликтер көрсөтүлдү. Тургундардын практикалык тажрыйбасы чоң кызыгууну жаратып, кызуу талкууга алынды.
