Кыргызстан Gavi менен эмдөө жаатында кызматташтыкты кеңейтет
Саламаттык сактоо министри Дамир Осмонов БУУнун Башкы Ассамблеясынын 81-сессиясынын алкагында өткөн Gavi Leap жогорку деңгээлдеги иш-чарага катышты. Бул тууралуу министрликтин маалымат кызматы кабарлады.
Иш-чара Gavi Вакцина альянсы тарабынан Руанда Өкмөтү менен биргеликте уюштурулган. Анда өлкөлөрдүн лидерлиги, туруктуу каржылоо жана саламаттык сактоо системаларынын натыйжалуулугун жогорулатуу маселелери талкууланды.
Министр өз сөзүндө Gaviнин Кыргызстандын эмдөө системасын өнүктүрүүгө кошкон салымын белгилеп, өлкө эмдөө программасына мамлекеттик каржылоону көбөйтүүгө багыт алганын айтты.
"Биз үчүн өтүү мезгилин этап-этабы менен, башкарылуучу жана алдын ала болжолдонгон шарттарда камсыз кылуу принципиалдуу мааниге ээ", - деди Осмонов.
Кыргызстандын артыкчылыктуу багыттары - муздак чынжырды модернизациялоо, вакциналарды эсепке алууну санариптештирүү жана Улуттук вакцина кампасын куруу. Өлкө 2026-2030-жылдарга карата улуттук арызын даярдоону аяктоодо.
Ошондой эле министр эмдөө системасындагы чакырыктарды - кызамык коркунучу, кадрдык чектөөлөр жана мигранттарды эмдөө маселелерин белгилеп, Gavi менен кызматташтыкты улантууга кызыкдар экенин билдирди.
