Кыргызстандын алгачкы спутниги октябрда космоско учурулат
Бүгүн МинКаб төрагасынын орун басары Эрлист Акунбеков "Кыргыз Асман" ачык акционердик коомунда иштелип чыккан алгачкы кыргыз спутниги менен тааныштырды. Бул тууралуу Айыл чарба министрлиги билдирди.
Акунбековдун айтымында, спутникти иштеп чыгуу жана чогултуу иштери Кыргызстанда алгачкы жолу жүргүзүлүп, долбоорго 2,5 жылдай убакыт кеткен. Учурда "Кыргыз Асман" ААКда акыркы даярдыктар жүрүүдө.
Спутник негизинен айыл чарба тармагында колдонулат. Андан алынган маалыматтар:
• эгин талааларынын абалын көзөмөлдөөгө;
• кургакчылыктын белгилерин эрте аныктоого;
• түшүмдүүлүккө алдын ала баа берүүгө;
• жайыттарды жана айыл чарба жерлерин талдоого мүмкүндүк берет.
Ошондой эле спутниктик мониторинг мөңгүлөрдүн, суу ресурстарынын жана экологиялык абалдын өзгөрүшүнө байкоо жүргүзүүгө, өзгөчө кырдаалдардын кесепеттерин баалоого шарт түзөт.
"Спутниктен алынган сүрөттөр аркылуу айыл чарба тармагында алдын ала божомолдоо мүмкүнчүлүктөрү кеңейет", - деди Акунбеков.
Белгилей кетсек "Кыргыз Асман" ААКнын жалгыз акционери - Министрлер кабинети. Ал эми жалгыз акционердин укуктарын ишке ашыруу боюнча функцияларды Суу ресурстары, айыл чарба жана кайра иштетүү өнөр жайы министрлиги жүзөгө ашырат.
