ӨКМ орун басары Венадагы эл аралык иш-чарага катышууда
Өзгөчө кырдаалдар министринин орун басары Искендер Сулайманов Вена шаарында өтүп жаткан эл аралык иш-чарага катышууда. Бул тууралуу министрликтин басма сөз кызматы кабарлады.
Маалыматка ылайык, "Жаратылыш аркылуу туруктуулук: дени сак ландшафттар үчүн жаратылышка негизделген чечимдер" аталышындагы иш-чара 20–25-сентябрда өтүп жатат. Аны Дүйнөлүк банктын Венадагы Өнүктүрүү жана билим борбору NBS INVEST программасынын колдоосу менен уюштурган.
Иш-чаранын максаты - жер ресурстарын туруктуу башкаруу, климаттын өзгөрүшүнө ыңгайлашуу жана табигый кырсыктардын тобокелдигин азайтуу боюнча тажрыйба алмашуу. Ага Армения, Бутан, Казакстан, Кыргызстан, Молдова, Непал, Тажикстан, Түркия жана Өзбекстандын өкүлдөрү катышууда.
Катышуучулар Австриянын дарыя экосистемаларын калыбына келтирүү жана жаратылыш ландшафттарын башкаруу боюнча тажрыйбасы менен таанышууда.
Алынган тажрыйба ӨКМ тарабынан Дүйнөлүк банктын колдоосу менен ишке ашырылып жаткан KG RESILAND долбоорунда колдонулат. Долбоор жаратылыш ландшафттарынын туруктуулугун жогорулатууга жана өзгөчө кырдаалдардын тобокелдиктерин азайтууга багытталган.
