Ошто алгачкы жолу OSH INVEST FORUM 2026 өттү

Бүгүн Ош шаарында алгачкы жолу OSH INVEST FORUM 2026 инвестициялык форуму өттү. Бул тууралуу мэриядан билдиришти.

Маалымдалгандай, иш-чарага мамлекеттик органдардын, ишкерлердин, инвесторлордун жана ири компаниялардын өкүлдөрү катышты. Форумду мындан ары жыл сайын өткөрүү пландалууда.

Форумга Ош шаарынын мэри Жанарбек Акаев катышып, шаарды өнүктүрүүгө багытталган инвестициялык мүмкүнчүлүктөрдү кеңейтүү, жаңы өндүрүштөрдү ачуу жана инфраструктуралык долбоорлорду ишке ашыруу боюнча пикирин билдирди.

Иш-чаранын алкагында инвестициялык долбоорлордун көргөзмөсү уюштурулуп, ишкерлер жана инвесторлор менен жолугушуулар өттү.

Форумда INTEGRA Engineering Group компаниясынын негиздөөчүсү, Novotel Bishkek мейманканасынын ээси Жоодар Сайдилкан, "Бишкек" ЭЭАнын башкы директору Умбриэль Темиралиев жана "Ак Кеме" курулуш компаниясынын негиздөөчүсү Рахматулла Мадазимов тажрыйбалары менен бөлүштү.

Жыйынтыгында инвестициялык кызматташтык боюнча меморандумга кол коюлуп, бир катар долбоорлорду ишке ашыруу боюнча сүйлөшүүлөрдү улантуу макулдашылды.