Садыр Жапаров Казакстандын президентине көңүл айтты
Бүгүн Казакстан Республикасында - Улуттук аза күтүү күнү деп жарыяланды. Тийиштүү жарлыкка президент Касым-Жомарт Токаев кол койгон. Ушуга байланыштуу КРнын Президенти Садыр Жапаров аскер кызматкерлеринин өлүмүнө алып келген кайгылуу окуяга байланыштуу Казакстандын президенти Касым-Жомарт Токаевге көңүл айтты.
Бул тууралуу президенттин администрациясы билдирди. Мамлекет башчынын аза кайгыны тең бөлүшүү билдирүүсүндө, төмөнүлөр айтылат:
“Каспий деңизинде аскердик машыгуу өткөрүү учурунда болгон кайгылуу окуянын кесепетинен Казакстан Республикасынын Куралдуу Күчтөрүнүн аскер кызматчыларынын каза болгондугу тууралуу кабарды терең кайгыруу менен кабыл алдым.
Кыргыз Республикасынын элинин жана жеке өзүмдүн атымдан Сизге, каза болгондордун үй-бүлөлөрүнө, туугандарына жана жакындарына аза кайгысын тең бөлүшүп көңүл айтам жана жабыр тарткандардын тезирээк сакайып кетишин каалайм”, - деп айтылат Мамлекет башчысынын телеграммасында.
Белгилей кетсек, Казакстандын Мангыстау облусунда 24-сентябрда Каспий деңизинин жээгинде күжүрмөн машыгуу учурунда аба ырайы кескин начарлап, катуу шамал күчөгөн. Бороондун кесепетинен бир топ аскер кызматкерлерин деңизге агып кетишкен. Акыркы расмий маалыматтар боюнча, 12 адам каза болуп, үчөө куткарылган (бири оор абалда ооруканада), калгандарын издөө иштери уланууда.
