Бишкекте мыйзамсыз курулуштарды аныктоо боюнча рейд жүрүп жатат
Бишкек шаарынын төрт районунда жерди өз алдынча ээлеп алуу жана мыйзамсыз курулуштарды аныктоо боюнча рейддик иш-чаралар өткөрүлүүдө. Бул тууралуу мэриянын маалымат кызматы кабарлады.
Маалымдалгандай, рейддер президенттин 2022-жылдын 8-апрелиндеги №109 Жарлыгын аткаруу максатында уюштурулууда. Текшерүү муниципалдык аймактык башкармалыктар жана конуштардын аймактарын камтыйт.
Октябрь районунда №407 МАБда уруксатсыз курулуп жаткан объектилер аныкталды. Эскертүүлөргө карабастан айрым жарандар курулушту улантышкан.
Свердлов районунда №304 МАБдын "Красный Строитель-2" конушунда тургундарга түшүндүрүү иштери жүргүзүлдү.
Биринчи Май районунда Маевка, Бугу-Эне-Багыш жана Алтын-Казык конуштарында рейд өттү. №205, №207 жана №208 МАБдарда 2024-жылдан бери мыйзамсыз тургузулган 171 пайдубал жана бүтпөй калган курулуш демонтаждалды. 2026-жылы "Теңдик" конушунун №378 контурунда мыйзамсыз пайдубал куюунун 3 фактысы аныкталып, материалдар ИИБга өткөрүлдү.
Ленин районунда Новопавловка жана Орок айыл аймактарында текшерүүдө мыйзамсыз курулуш фактылары катталган жок.
Мыйзамсыз курулуштарды жана жер тилкелерин өз алдынча ээлеп алуу фактыларын аныктоо жана аларга бөгөт коюу боюнча иштер улантылууда.
