Кыргызстан менен Улуу Британия минералдык ресурстар жаатында кызматташууну талкуулады
Жаратылыш ресурстары министринин биринчи орун басары Жеңиш Сейдалиев Улуу Британиянын Азербайжан жана Борбор Азия боюнча соода өкүлү, Лорддор палатасынын мүчөсү Лорд Джон Алдердайс менен жолугушту. Бул тууралуу министрликтен билдиришти.
Маалыматка ылайык, жолугушууда кыргыз-британ кызматташтыгын өнүктүрүү, маанилүү минералдык ресурстар, инвестиция тартуу, келечектүү объекттерди геологиялык изилдөө жана заманбап технологияларды киргизүү маселелери талкууланды.
Өзгөчө көңүл экологиялык коопсуздук, туруктуу өнүгүү, геологиялык маалыматтардын сапатын жогорулатуу жана квалификациялуу кадрларды даярдоого бурулду.
Жыйынтыгында тараптар техникалык консультацияларды жана практикалык өз ара аракеттенүүнү улантууга, стратегиялык өнөктөштүктү мындан ары өнүктүрүүгө даяр экенин ырасташты.
