Кыргызстанда 1,9 млн тонна дан жыйналды
Өлкө боюнча негизги айыл чарба өсүмдүктөрүнүн түшүмдүүлүгү жана дүң жыйымы былтыркыга караганда өстү. Бул тууралуу Айыл чарба министрлиги билдирди.
Маалыматка ылайык, дан эгиндери 562,6 миң гектардан жыйналып, жалпы аянттын 91,1% түздү. 1 млн 937,6 миң тонна дан жыйналып, орточо түшүмдүүлүк 29,8 ц/га болду. Чүй облусу 699,4 миң тонна менен алдыда.
Жашылча 43,7 миң гектардан жыйналып, 757,2 миң тонна алынды. Картошкадан 671,8 миң тонна жыйналып, түшүмдүүлүк 162 ц/га болду. Ысык-Көл облусу 257,2 миң тонна менен алдыңкы орунда.
Бахча өсүмдүктөрү 86% жыйналып, 211,1 миң тонна продукция алынды. Түштүктө пахта жыйноо уланууда, учурда 3 миң тонна жыйналды. Май өсүмдүктөрүнүн дүң жыйымы 8,7 миң тонна.
Чүй облусунда кант кызылчасын казуу башталды. Министрлик түшүмдү өз убагында, жоготуусуз жыйноо иштерин көзөмөлдөп жатат.
