Садыр Жапаров TİKAнын президенти Абдуллах Эренди кабыл алды
Өлкө башчысы Садыр Жапаров бүгүн Түрк кызматташтык жана координация агенттигинин (TİKA) президенти Абдуллах Эренди кабыл алды. Бул тууралуу президенттин администрациясы билдирди.
Маалымдалгандай, жолугушууда TİKA менен кызматташтыкты мындан ары өнүктүрүү жана социалдык-экономикалык, гуманитардык тармактарда биргелешкен долбоорлорду ишке ашыруу келечеги талкууланды.
Президент негизги багыттар катары саламаттык сактоону, айыл чарба лабораториялык инфраструктурасын модернизациялоону, кесиптик-техникалык билим берүүнү жана "жашыл" энергетика тармагында адистерди даярдоону белгиледи.
Мындан тышкары өлкөнүн алыскы жана бийик тоолуу райондорунда чакан гидроэнергетика, медициналык инфраструктура жана социалдык кызматтардын жеткиликтүүлүгүн жогорулатуу боюнча долбоорлорго өзгөчө көңүл буруу сунушталды.
Өз кезегинде Абдуллах Эрен Түркия Президенти Режеп Тайып Эрдогандын жылуу саламын жеткирип, Кыргызстандын социалдык-экономикалык көрсөткүчтөрүнүн оң динамикасын белгиледи жана жакынкы мезгилде ишке ашырылуучу жаңы долбоорлор тууралуу маалымат берди.
