Кыргызстан менен Япония туризмдеги кызматташтыкты кеңейтүүнү талкуулады
Туризмди өнүктүрүү боюнча мамлекеттик агенттиктин директору Эдуард Кубатов Tourism Expo Japan көргөзмөсүнүн алкагында Япониянын Туристтик агенттиктер ассоциациясынын (JATA) өкүлдөрү Yuji Hara жана Tadashi Shimura менен жолугушту. Бул тууралуу агенттиктен билдиришти.
Маалымдалгандай, тараптар кыргыз-япон туристтик кызматташтыгын кеңейтүү, Кыргызстандын туристтик потенциалын жапон рыногунда илгерилетүү жана туристтик алмашууну көбөйтүү маселелерин талкуулашты.
Жолугушууда туризм тармагындагы кызматташтык жөнүндө меморандумдун аткарылышы жана 2025-2026-жылдары жапон компаниялары үчүн уюштурулган маалыматтык турлардын жыйынтыктары каралды. Тараптар мындай турларды көбөйтүүгө жана жаңы өнөктөштүк түзүүгө кызыкдар экенин билдиришти.
Ошондой эле Кыргызстан менен Япониянын ортосунда түз авиакаттам ачуу маселеси каралды.
Кыргызстан Tourism Expo Japan көргөзмөсүнө беш жылдан бери катышып келет. Улуттук стендге болгон кызыгуу жыл сайын өсүүдө.
Жыйынтыгында тараптар туристтик алмашууну өнүктүрүү боюнча кызматташтыкты улантууга макулдашты. Жапон тарап 2026-жылдын 1-декабрында өтө турган "Ала-Тоо Резорт" тоо лыжа курортунун ачылышына чакырылды.
