Кыргызстанда медицина кызматкерлери үчүн санариптик окутуу башталды
Кыргызстанда медицина кызматкерлерин кесиптик ишин токтотпостон санариптик технологияларга окутуу боюнча алгачкы адистештирилген программа ишке кирди. Программа 40 миңге жакын дарыгерди камтууга багытталган. Бул тууралуу Саламаттык сактоо министрлиги билдирди.
Окуу-усулдук комплекс саламаттык сактоонун санариптик системаларын өздөштүрүүгө жана тесттик чөйрөдө практикалык билимди бекемдөөгө арналган. Дарыгерлер бирдиктүү санариптик чөйрөдө маалыматтык системалардын иштөө принцибин жана медициналык маалыматтарды алмашуу тартибин үйрөнүшөт.
Окутууда санариптик гигиенага, жеке жана медициналык маалыматтарды коргоого өзгөчө көңүл бурулат.
Программа С.Б. Данияров атындагы Кыргыз мамлекеттик медициналык кайра даярдоо жана квалификацияны жогорулатуу институтунун платформасына жайгаштырылды. Курстардан өтүү менен кредит-сааттар эсептелет жана кадрлардын маалыматтык системасы аркылуу көзөмөлдөнөт.
"Санариптик системалардын натыйжалуулугу дарыгерлердин даярдыгына түздөн-түз көз каранды. Мындай ыкма медициналык жардам көрсөтүүгө тоскоол болбостон, максималдуу адисти окутууга мүмкүндүк берет", - деди Саламаттык сактоо министринин биринчи орун басары Тилек Мамадиалиев.
Долбоор Дүйнөлүк саламаттык сактоо уюмунун колдоосу менен БУУнун "Кыргыз Республикасында саламаттык сактоодогу санариптик ажырымды жоюу" программасынын алкагында ишке ашты.
