Кыргызстандын делегациясы БУУнун 15-конгрессине катышууда
Кыргызстандын делегациясы Бириккен Араб Эмираттарынын Абу-Даби шаарында өтүп жаткан БУУнун кылмыштуулукту алдын алуу жана кылмыш-жаза адилеттүүлүгү боюнча 15-конгрессине катышууда. Бул тууралуу Башкы прокуратура билдирди.
Маалыматка караганда, делегация курамында юстиция министри Алмаз Айылчиев, Башкы прокурордун орун басары Нурбек Каимов жана Башкы прокуратуранын өкүлдөрү бар.
Жогорку деңгээлдеги сегментте Кыргызстандын санариптештирүү, пробацияны өнүктүрүү жана эл аралык кызматташтыкты чыңдоо боюнча артыкчылыктары тааныштырылды.
Башкы прокуратуранын демилгеси менен Кыргызстан "Адилеттүүлүк үчүн милдеттенме" (Pledge4Justice) демилгесин колдоп, 2026-2031-жылдарга карата санариптик доордо кылмыш иштери боюнча эл аралык кызматташтыкты күчөтүү жана БУУнун киберкылмыштуулукка каршы конвенциясын ишке ашыруу боюнча улуттук милдеттенме алды.
Конгресстин алкагында Нурбек Каимов БАЭнин Юстиция министрлиги менен жолугушуп, экстрадиция, өз ара укуктук жардам жана соттолгондорду өткөрүп берүү маселелерин талкуулады.
Ошондой эле Кыргызстандын өкүлдөрү коррупциянын алдын алууда маалыматтарды колдонуу жана сот адилеттигин санариптештирүү боюнча тематикалык иш-чараларда улуттук тажрыйбаны тааныштырды.
