Токмокто таштандыны кеч чыгарган "Экологист" ишканасына 17 миң сом айып салынды
Токмок шаарында таштанды чыгаруу боюнча текшерүү жүргүзүлүп, "Экологист" ишканасына 17 миң сом айып пул салынды. Бул тууралуу Жаратылыш ресуртары министрлиги билдирди.
Маалым болгондой, жарандардын кайрылуусунун негизинде Экологиялык жана техникалык көзөмөл кызматы текшерүү жүргүзгөн. Натыйжада шаарда катуу тиричилик калдыктарын чогултууну "Экологист" ишканасы жүргүзөрү, анын балансында 5 атайын техника бар экени аныкталган.
Текшерүүдө айрым аймактарда таштанды чыгаруу графигинен четтөөлөр болгону белгилүү болду. Буга техникалык жана финансылык кыйынчылыктар, ошондой эле шаардагы жол оңдоо иштери себеп болгон. Оңдоо иштеринен улам айрым таштанды аянтчаларына техниканын кириши кыйындаган.
Мыйзам бузуулар үчүн ишканага Укук бузуулар жөнүндө кодекске ылайык 17 миң сом айып пул салынды.
