У.Ниязбеков: видео-көзөмөлдүн санын жыл аягына чейин 20 миңге жеткирүүгө милдеттүүбүз
Кыргызстанда жыл аягына чейин иштеп жаткан видео-камералардын санын 20 миңге жеткирүү пландалууда. Учурда өлкө боюнча 10 миңден ашуун видео-камера иштеп жатат. Бул тууралуу бүгүн Ички иштер министрлигинде өткөн аппараттык кеңешмеде ички иштер министри - Улан Ниязбеков билдирди.
Кеңешмеде тартип сакчылар 9 айдын жыйынтыгын чыгарып, коомдук тартипти сактоо жана жаш өспүрүмдөрдүн коопсуздугун камсыздоо маселелерин кароого алышты.
Анын жүрушундө министр “Санарип милиция” системасын өнүктүрүп, ички коопсуздукту камсыздоодо заманбап технологияларды кеңири колдонуу зарылдыгын белгиледи.
“Эң башкысы — өлкөбүздүн ички коопсуздугун бекемдеп, элибиздин бейпил жашоосун камсыз кылуу. Бул багытта “Санарип милиция” системасын өнүктүрүп, заманбап технологияларды кеңири колдонуу менен иш алып барышыбыз зарыл. Бүгүнкү күндө өлкө боюнча 10 миңден ашуун видео-камера иштеп жатат. Жыл аягына чейин алардын санын 20 миңге жеткирүү милдети турат”, — деди Улан Ниязбеков.
Ошондой эле коомдук коопсуздукту камсыздоодо “Коопсуз өлкө” долбоорунун маанилүүлүгү белгиленип, санариптик технологияларды жана заманбап техникалык каражаттарды мындан ары да кеңири киргизүү тапшырмасы коюлду.
Кеңешменин соңунда министр ички иштер органдарынын жетекчилерине коомдук коопсуздукту камсыздоо боюнча коюлган милдеттерди так жана сапаттуу аткарууну, жарандар менен иштөөдө кесипкөйлүк жана жоопкерчиликти жогорулатууну тапшырды.
