Жогорку Кеңештин имаратына чет өлкөлүк туристтерди кабыл алуу уюштурулат
Жогорку Кеңештин төрагасы Марлен Маматалиев парламенттин имаратын кыдыруу учурунда чет өлкөлүк туристтер үчүн Жогорку Кеңешке туруктуу тааныштыруу сапарларын уюштуруу маселесин иштеп чыгууну тапшырды.
ЖКтин басма сөз кызматынын маалыматына караганда, төрага акыркы жылдары чет өлкөлүк жарандардын кыргыз парламентинин ишмердүүлүгүнө болгон кызыгуусу артып, Жогорку Кеңештин иши менен таанышуу өтүнүчтөрү көбөйүп жатканын белгилеген.
Ага ылайык, аптасына бир жолу белгиленген тартипте уюштурула турган экскурсиялык программанын алкагында туристтерге музейге жана жыйындар залдарына кирүү мүмкүнчүлүгү берилет.
Билдирүүгө ылайык, экскурсиялык сапарларды уюштуруу Жогорку Кеңештин ачык-айкындуулугун арттырууга өбөлгө түзөт. Чет өлкөлүк конокторго КРнын парламентинин ишмердүүлүгү тууралуу кеңири маалымат алууга мүмкүнчүлүк берет. Мындан тышкары, атайын сувенирдик бурч уюштурулуп, меймандар андан парламенттин сувенирдик продукцияларын сатып ала алышат.
Муну менен катар Төрага Жогорку Кеңештин имараты өзгөчө статуска жана стратегиялык мааниге ээ экенин белгилеп, тааныштыруу сапарларын уюштурууда коопсуздуктун белгиленген талаптарын жана парламенттин аймагында жүрүү тартибин так сактоо зарылдыгын баса белгиледи.
