Бишкекте капиталдык оңдоодон кийин №63 бала бакча ачылды
Кече Бишкек шаарынын Коммунаров көчөсүндө жайгашкан №63 бала бакчанын капиталдык оңдоодон жана жаңылоодон кийинки ачылышы болду. Ага шаар башчысы Айбек Джунушалиев катышып, бала бакчанын топтук бөлмөлөрүнүн, ашканасынын, оюн аянтчаларынын жана башка инфраструктуралык объектилеринин абалы менен таанышып чыкты.
Анын жүрүшүндө, тиешелүү кызматтарга өрт коопсуздугу, аймакты уюштуруу жана зарыл болгон тосмолорду орнотуу маселелерин кошумча карап чыгуу тапшырылды.
Иш-чаранын алкагында мэр жакынкы үйлөрдүн тургундары менен да жолугушту. Тургундар жүргүзүлгөн иштер жана бала бакчанын кайрадан калыбына келтирилгени үчүн ыраазычылыгын билдиришти.
Бала бакчаны капиталдык оңдоо жана жаңылоо иштерин Бишкек шаардык капиталдык курулуш башкармалыгы жүргүздү. Курулуш иштерине 118 млн сом каражат жумшалган.
Буга чейин бала бакчанын имараты 1990-жылдары жеке менчикке өткөрүлүп берилген. 2024-жылы объект муниципалдык менчикке кайтарылып, 2025-жылы аны калыбына келтирүү жана жаңылоо иштери башталган.
Бала бакчанын аймагында 12 оюн аянтчасы курулуп, көрктөндүрүү жана жашылдандыруу иштери жүргүзүлдү. Объектти капиталдык оңдоо жана жаңылоо иштерин “Эйти Эмпайр” ЖЧКсы аткарды.
