Ош облусунда 304 миң сомдук жашыруун жүк аныкталды
Ош облусунун Кара-Суу районунда рейддик көзөмөл учурунда салык мыйзамдарын бузуу фактысы аныкталды. Бул тууралуу Мамлекеттик салык кызматы билдирди.
Маалым болгондой, жүк ташуучу унааны текшерүү маалында Салык кызматы тарабынан коюлган расмий контролдук пломба бузулуп, үзүлгөнү аныкталган. Мындан тышкары айдоочу эсепке алынбаган товарды жашырып өтүүгө аракет кылган. Аныкталган жүктүн жалпы баасы 304 миң 642 сомду түзөт.
Мыйзамга ылайык, контролдук пломбаны өз алдынча бузгандыгы үчүн 100 миң сомдон 200 миң сомго чейин айып пул каралган. Эсепке алынбаган товарды жашыргандыгы үчүн да айып пул салынып, товар конфискацияланат.
Учурда чогултулган материалдар күнөөлүү адамдарды жоопкерчиликке тартуу үчүн укук коргоо органдарына өткөрүлүп берилүүгө даярдалууда.
Салык кызматы Евразия экономикалык бирлигинин бажы чек арасы аркылуу өткөн бардык транспорт каражаттары мамлекеттик көзөмөлдө экенин эскертип, мыйзамсыз аракеттер жоопкерчиликке алып келерин билдирди.
