Соцфондго 8 айда 9 миңден ашуун кайрылуу түштү
2026-жылдын январь-август айларында КРнын Социалдык фондунун Коомчулук менен иштөө башкармалыгына жарандардан 9 344 кайрылуу түштү. Бул тууралуу аталган мекемеден маалымдашты.
Билдирүүгө караганда, жарандар көбүнчө ишеним телефондору аркылуу кайрылышкан. Кайрылуулардын жалпы саны 4 559 болгон. Алардын ичинен мобилдик ишеним телефону аркылуу 1 827, ал эми “Түндүк” системасы аркылуу маалымат алуу үчүн 1 583 кайрылуу келип түшкөн. Мындан тышкары, оозеки түрдө 809, жазуу жүзүндө 468 кайрылуу катталган.
Соцфонддун жетекчилигинин жеке кабыл алуусуна 49 жаран кайрылса, «Пикир» порталы аркылуу 40, «Биринчи кабылдама» («Биринчи радио») программасы аркылуу 9 кайрылуу болгон. Жарандарды негизинен төмөнкү маселелер кызыктырган:
- пенсияларды жогорулатуу жана индексациялоо;
- мамлекеттик социалдык камсыздандыруу маселелери;
- пенсия дайындоо жана кайра эсептөө укугу;
- пенсиянын туура эсептелиши жана төлөмдөрдүн өз убагында берилиши;
- Мамлекеттик топтоо пенсия фондунун каражаттарын алуу, анын ичинде туруктуу жашоо үчүн чет өлкөгө көчүп кеткен учурдагы төлөмдөр.
Соцфонддун маалыматына ылайык, түшкөн бардык кайрылуулар боюнча жарандарга өз убагында кыргыз жана орус тилдеринде кеңири түшүндүрмөлөр берилип турган.
