Азия оюндары-2026: Асан Жанышов, Раззак Бейшекеев жана Мээрим Жуманазарова сыйланды
Кече, Япониянын Айти-Нагойя шаарында өтүп жаткан XX Азия оюндарынын алкагында күрөш боюнча мелдештердин алгачкы күнүнүн жыйынтыгы менен байгелүү орундарды ээлеген спортчуларды сыйлоо аземи болуп өттү.
Дене тарбия жана спорт мамлекеттик агенттигинин маалыматына караганда, сыйлоо аземине Кыргызстандын курама командасынын үч спортчу - Асан Жанышов, Раззак Бейшекеев жана Мээрим Жуманазарова катышты.
Грек-рим күрөшү боюнча 87 кг чейинки салмак категориясында Асан Жанышов күмүш медалга ээ болду. Ал мелдешти чейрек финалдан баштап, Өзбекстандык Жалгас Бердимуротовду 4:0 эсебинде жеңип алган. Жарым финалда Асан Жанышов Казакстандын өкүлү Шамиль Ожаев менен күч сынашып,6:1 эсебинде жеңишке жеткен. Ал эми чечүүчү беттеште Жапониялык Йошидо Тайзо менен килемге чыгып, мелдеш 1:11 эсебинде Жапон спортсменинин жеңиши менен аяктаган.
67 кг чейинки салмак категориясында Раззак Бейшекеев коло медаль тагынды. Ал алгачкы беттешинде Катардын өкүлү Ареф Мохаммадини 4:0 эсебинде жеңген. Жарым финалда Өзбекстандын өкүлү Айтжан Халмаханов менен беттешип, 0:5 эсебинде жеңилип калган. Коло медаль үчүн беттеште Кытайлык Ленг Жи ни 5:1 эсебинде жеңип, үчүнчү орунга ээ болду.
Кыз-келиндер күрөшү боюнча 68 кг чейинки салмак категориясында Мээрим Жуманазарова коло медалга ээ болду. Мээрим Жуманазарова мелдештеги алгачкы беттеште Өзбекстандын өкүлү Фируза Есенбаеваны 8:0 эсебинде жеңип, кийинки баскычка өткөн. Жарым финалда кыргызстандык спортсмен Түндүк Кореянын өкүлү Пак Сол Гум менен беттешип, жеңилип калган. Коло медаль үчүн болгон беттеште Мээрим Жуманазарова Түштүк Кореянын өкүлү Пак Хён Гёнду 8:1 эсебинде жеңип, XX Азия оюндарынын коло медалынын ээси болду.
Бүгүнкү мелдеште грек-рим күрөшү боюнча - Жоломан Шаршенбеков, Акжол Махмудов, Үзүр Жусупбеков жана кыз-келиндер күрөшү боюнча Сезим Жуманазаровалар күч сынашмакчы.
