Шакиранын концертине эң арзан билеттер бир саатта сатылып кетти
18-октябрда “Бишкек Аренада” өтө турган дүйнөлүк жылдыз Шакиранын концертине билеттер бүгүн саат 09:00дө сатылышы башталган. Сатуу башталгандан кийин эле баасы 12 миң сом болгон эң арзан билеттер толугу менен сатылып кеткен. Саат 10:50гө карата ticket.gov.kg сайтында 22 миң сомдон 40 миң сомго чейинки билеттер гана жеткиликтүү болгон.
Концерттин расмий билет оператору — GovTicket. Билеттердин баасы төмөнкүдөй белгиленген:
- фан-зона — 40 миң сом;
- бий аянтчасы (танцевальный партер) — 27 миң сом;
- Skybox — бир адамга 30 миң сом;
- отургуч орундар — 13,5 миң сомдон 40 миң сомго чейин;
- көрүнүшү чектелген орундар — 12 миң сом.
Уюштуруучулардын маалыматына ылайык, сахна стадиондун чыгыш трибунасына орнотулат. Сахнанын артындагы орундар көрүүчүлөр үчүн жабык болот. Ошондой эле чектелген сандагы VIP-билеттер кийинчерээк өзүнчө баа менен сатыкка чыгарылары маалым болду.
Эске салсак, Бишкек шаары ырчынын Las Mujeres Ya No Lloran World Tour дүйнөлүк гастролдук туруна кирген. Концертте Шакиранын белгилүү хиттери жана жаңы альбомундагы чыгармалары аткарылып, шоу ири сахналык коюу, хореография жана визуалдык эффекттер менен коштолот. Бул ырчынын Борбор Азиядагы алгачкы концерти болмокчу.
