Баткенде 3 миң доллар пара талап кылган директор кармалды
Баткен облусунда пара талап кылууга шектелген жаран кармалды. Бул тууралуу Ички иштер министрлиги маалымдады.
Министрлик билдиргендей, милицияга акча талап кылуу фактысы боюнча арыз келип түшкөн. Такталгандай, 15-сентябрда Кадамжай районундагы ЖЧКлардын биринин электр энергиясы жогорку чыңалуудагы линияга байланыштуу кемчиликтер жоюлбагандыктан өчүрүлгөн.
22-сентябрда Баткен облустук электр тармактар ишканасынын директору ЖЧКнын жетекчиси менен сүйлөшүүдө электр энергиясын кайра жандыруу жана кемчиликтерди жоюуга убакыт берүү үчүн 3 миң АКШ долларын талап кылган.
27-сентябрдагы жолугушууда арыз ээси акчаны бере албай турганын билдирген. Бирок директор акчаны Кадамжай райондук электр тармактарынын башчысына берүүнү айткан.
Бул факты боюнча Кылмыш-жаза кодексинин 343-беренеси (Опузалап пара алуу) менен кылмыш иши козголгон.
Ыкчам-тергөө иштеринин натыйжасында Кылмыш иликтөө башкы башкармалыгынын жана Баткен ОИИБнын Тергөө кызматынын кызматкерлери Баткен облустук электр тармактар ишканасынын директору 1975-жылы туулган М.К.ны кармашкан.
Учурда шектүү убактылуу кармоо жайына киргизилди.
