Кыргызстандын биринчи спутниги орбитага чыгарылды
Кыргызстандын биринчи улуттук спутниги 1-октябрда орбитага чыгарылды. Учуруу аземине АКШда иш сапары менен жүргөн өлкө башчысы Садыр Жапаров катышты. Бул тууралуу президенттин администрациясы билдирди.
Маалымдалгандай, учуруу Калифорния штатындагы Ванденберг аскердик-аба базасынан SpaceX компаниясынын Falcon 9 ракетасы аркылуу ишке ашырылды.
Спутник бир ракета менен учурулган космостук аппараттар тобунун курамында орбитага чыгарылды. Долбоор Кыргызстан менен Бириккен Араб Эмираттарынын биргелешкен ишинин натыйжасы болду. Спутник Бишкек шаарындагы Башкаруу борборунан башкарылат.
Спутниктин учурулушу өлкө үчүн космостук маалыматтарды пайдалануунун жаңы мүмкүнчүлүктөрүн ачат. Алынган маалыматтар:
• айыл чарба жерлерине, мөңгүлөргө, суу объекттерине, токойлорго жана жайыттарга мониторинг жүргүзүүгө;
• жер казынасын мыйзамсыз пайдаланууну, уруксатсыз таштанды төгүүчү жайларды аныктоого;
• логистикалык каттамдарды оптималдаштырууга мүмкүндүк берет.
Өзгөчө маани жаратылыш коркунучтарына мониторинг жүргүзүүгө берилет. Спутник кургакчылык, суу ташкыны, жер көчкү, сел жана токой өрттөрүнүн белгилерин ыкчам аныктоого жардам берет.
Келечекте маалыматтар мамлекеттик санариптик системалар менен интеграцияланып, мейкиндик карталарын жана аналитикалык моделдерди түзүү үчүн колдонулат.
