Кыргызстандын тышкы иштер министри Гананын президенти менен жолукту
Ганага болгон расмий визитинде Кыргызстандын тышкы иштер министри Жээнбек Кулубаев 1-октябрда Гананын президенти Жон Драман Махама менен жолугушту. Бул тууралуу ТИМдин басма сөз кызматы билдирди.
ТИМдин башчысы Гананын президентине Кыргызстандын президенти Садыр Жапаровдун жолдогон саламын жеткирди.
Маалымдалгандай, Кулубаев Кыргызстан Африка континентинде Гананы ишенимдүү өнөктөш катары көрөрүн жана саясий диалогдорду өнүктүрүүгө, соода-инвестициялык, гуманитардык кызматташтыкка, ошондой эле аймактар аралык алакага кызыктар экендигин баса белгиледи.
Президент Жон Драман Махама эки тараптуу диалогдун активдешкенин позитивдүү түрдө билдирди жана алдыдагы саясий кеңешмелердин маанилүүлүгүн белгиледи.
Гананын башчысы Кыргызстан менен соода-инвестициялык шериктештиктин өнүгүшүнө кызыктар экенин билдирип, эки тараптуу мамилелерди бекемдөөдө визиттердин баалуулугун баса белгиледи.
