Министр Жээнбек Кулубаев Гананын Алтын кеңешинин штаб-квартирасына барды
1-октябрда Кыргыз Республикасынын Тышкы иштер министри Жээнбек Кулубаев Гана Республикасына болгон расмий сапарынын алкагында Аккра шаарындагы Гананын Алтын кеңешинин (GoldBod) штаб-квартирасына барды. Бул тууралуу ТИМдин басма сөз кызматы билдирди.
Маалым болгондой, жолугушуунун жүрүшүндө Кыргыз Республикасынын Тышкы иштер министри аталган мамлекеттик корпорациянын жетекчилиги менен жолугуп, Ганада чакан көлөмдөгү алтын өндүрүүнү борборлоштуруу, алтынды өлкө ичинде милдеттүү түрдө аффинаждан өткөрүү, ошондой эле баалуу металлдарды улуттук алтын-валюта резервдерин түзүү системасына натыйжалуу интеграциялоо тажрыйбасы менен таанышты.
Өз кезегинде министр Кулубаев Гана тарапка Кыргыз Республикасынын стратегиялык минералдык ресурстарды башкаруу жаатындагы тажрыйбасы, анын ичинде "Кумтөр" кенин улутташтыруу тарыхы тууралуу маалымат берди. Кенди иштетүүдөн түшкөн кирешелер өлкөдөгү маанилүү социалдык-экономикалык маселелерди чечүүгө жана экономикалык активдүүлүктү жогорулатууга олуттуу салым кошкону белгиленди.
Жолугушуунун жүрүшүндө тараптар алтындын жүгүртүлүшүн мамлекеттик көзөмөлдөө механизмдерин, контрабандага каршы күрөшүү чараларын, ошондой эле баалуу металлдардын келип чыгышын көзөмөлдөөнүн санариптик системаларын киргизүүнүн келечегин кеңири талкуулашты.
Өзгөчө көңүл Кыргызстандын жана Гананын тиешелүү мамлекеттик органдарынын ортосунда тажрыйба алмашуу маселелерине бурулду. Алтын өндүрүү тармагын жөнгө салуу, заманбап технологияларды жана тоо-кен тармагындагы санариптик чечимдерди колдонуу жаатында эксперттик консультацияларды өткөрүүнүн жана практикалык өз ара аракеттенүүнү жолго коюунун маанилүүлүгү белгиленди.
