Турак үйлөрдү камсыздандыруу эрежелери өзгөрдү
Министрлер Кабинети Кыргызстан камсыздандыруу рыногунун катышуучулары үчүн жаңы эрежелерди бекитти. Ага ылайык эми камсыздандыруучу, кайра камсыздандыруучу компаниялар, ошондой эле брокерлер, актуарийлер, баалоочулар, сюрвейерлер жана аджастерлер жаңыланган квалификациялык талаптарга жооп берүүгө милдеттүү.
Өкмөттүн билдиришинче, камсыздандыруу уюмун профилдик билими бар, соттолбогон жана тажрыйбалуу адистер жетектей алат. Брокерлер үчүн реестрде милдеттүү түрдө катталуу талабы, актуарийлер үчүн камсыздандыруу тарифтерин эсептөөнүн жаңы стандарттары киргизилет.
Ушундай эле талаптар чыгашалар менен тобокелчиликтерди баалачу эксперттерге да коюлат. Мындан сырткары, көйгөйлүү камсыздандыруу компанияларына убактылуу администрацияны дайындоо тартиптери да өзгөрдү. Тагыраагы, убактылуу администрацияга активдерди жана милдеттемелерди башкаруу боюнча кеңейтилген укуктар берилген.
Ошондой эле МинКабдын жаңы токтомуна ылайык камсыздандырылган үй башка бирөөнүн ээлигине өтсө милдеттүү камсыздандыруу келишими автоматтык түрдө үйдүн жаңы ээсине өтөт.
