1857 үй, 3006 жер участогу жер мунапысына жатпайт
Бишкек мэриясынын муниципалдык мүлктөрдү башкаруу боюнча департаментинин директору Уран Мусаев “Биринчи радиого” 2021-жылдын декабрынан кийин курулган 1857 турак үй жана бош жаткан 3006 жер участогу жер мунапысына кирбей турганын билдирди.
Буга улай ал 156 участок камакта экенин, 2643 үй таштанды полигонунун коргоо зонасында турганын айткан. Ошондой эле 1170 жер участогу боюнча арыз берүүчүлөр ортосунда талаш маселелер катталган.
Башка көйгөйлүү категориялар арасында: 118 жер участогу жогорку чыңалуудагы электр линияларынын коргоо зонасында, 21 участок жылуулук тармактарынын түтүктөрүнүн территориясында, 60ы Бакай-Ата жаңы конушунун жана Бишкек ЖЭБинин күл төгүүчү жеринин коргоо зонасында жайгашканы айтылат.
Ошондой эле 31 адам жашабаган үй, саркофаг жана оорулуу малды көмүүчү жайда 22 объект, суу коргоо зонасындагы 5 объект, ошондой эле Кара Жыгач бакчасында 102 үй аныкталган.
