Курулуп жаткан көп кабаттуу үйлөрдүн мыйзамдуу экенин кантип билсе болот?
Кечээ Бишкек шаар куруу жана архитектура башкы башкармалыгынын жетекчиси Медербек Кыдырмаев журналисттер менен болгон маалымат жыйында курулуп жаткан көп кабаттуу үйлөрдүн мыйзамдуу, мыйзамдуу эмес экенин жарандар кантип текшерсе боло турганын айтты.
“Ушул тапта Курулуш министрлиги тарабынан бекитилген кандайдыр бир үйдү, турак жайды курууга уруксат алуу боюнча жобо бар. Ошондой эле курула турган имараттын шаардагы инженердик тармактарга кошулуусу жана аны долбоорлоо боюнча шаардык корутунду жазылат. Ал корутунду жазылыш үчүн курулуш компаниясы “Бишкек суу канал”, “Түндүкэлектр” сыяктуу тиешелүү ишканалардан техникалык шарттамаларды алышы керек. Алар жок Бишкек шаар куруу жана архитектура башкы башкармалыгы тарабынан долбоор макулдашылбайт. Эгер долбоор биздин мекеме менен макулдашылган болсо, демек, алардын шаардык инженердик тармактарга кошулууга уруксаты бар”,-дейт М.Кыдырмаев.
Шаардын башкы архитекторунун айтымында, ар бир курулуш объектисинин коргонунда QR код илинип турушу керек. Кардарлар ошол QR код аркылуу объектинин тиешелүү документтери бар, жогун аныктап алса болот.
“Ошондой эле кардарга айта кетүүчү сунуш, үй сатып алуучу менен курулуш компаниянын ортосундагы келишимди үй сатып алуучу Бишкек шаардык кадастрына барып каттатып коюшу керек. Эгер компаниянын курулушка уруксаты жок болсо Бишкек шаардык кадастры аны каттоого албайт”,-дейт ал.
