Н.Түлеев: "Бул жер Кыргызстандын Монте-Карлосу болот"
Бишкектин Чүй проспектисиндеги курулуп жаткан Old Bishkek комплексинин айланасында кызуу талаш боюнча "Кабар" маалымат агенттиги аталган долбоордун жетекчиси Нариман Түлеевден жогоруда айтылган пикирлер боюнча жооп алган.
Н.Түлеевдин айтымында, бул долбоор толук бүткөн соң Кыргызстандын Монте-Карлосу болот.
Ал шаар тургундарын сабыр кылып, бир аз күтө турууну өтүндү.
“Бул долбоорду биз шаар кеңешинде коргоп, бекиттиргенбиз. Баштапкы долбоордо кандай болуп көрсөтүлгөн болсо, дал ошондой болуп бүтөт. Сиздер айтып жаткан 3 кабаттуу жаңы салынып жаткан имараттын сырткы көрүнүшү толкун түрүндө болот. Шаар көркүн бузган артындагы алтын саткан эски дүкөндөр 30 жылдан бери бузулбай иштеп келген. Себеби алар жеке менчикке өтүп кеткен. Ошол эски дүкөндөр жабылды. Имараттын баш жагында кароо мунарасы болот. Туристтер жана коноктор ал жакка чыгып, бул жердеги кооздукка күбө болушат”,-дейт Бишкек шаарынын экс-мэри, бизнесмен.
Буга улай ал туурасы 15 метрлик жол 16 метрге кеңейтилип, 2 тилке кошулганын, 4 тилкеден, 6 тилкелүү жолго айланганын билдирди.
“Биз жолду тарыткан жокпуз, тескерисинче кеңейттик. Атайын автобустар токтой турган чөнтөкчөлөр да жасалды. Шопоков көчөсү тарабында 300дөн ашык унаага ылайыкталган жер алдындагы унаа токтотуучу жай болот. Дагы 2 ай убакыт бергиле, мен долбоорду аягына чыгарайын. Эгерде, ошондо Түлеев начар жасады дешсе, кайра жасап берүүгө даярмын”,-дейт ишкер.
Буга улай ишкер бул жер шаардыктар күнү-түнү эс ала турган Кыргызстандын Монте-Карлосу болорун билдирген.
