МИК 35, 40 кабаттуу 14 үйдү куруп баштады
Бишкек шаарынын Достоевский көчөсүндө, Анкара көчөсүнө жакын жайгашкан жерде МИК жаңы объектини куруп баштады. Бул жерде 35 кабаттан турган 10 үй, ошондой эле 40 кабаттан турган 4 үй куруу пландаштырылып жатат. Жалпы батирлердин саны - 4 160 батир. Бул тууралуу бүгүн Бишкекте өткөн маалымат жыйынында “Мамлекеттик ипотекалык компания” ААКсынын калк менен иштөө башкармалыгынын жетекчиси Гүлзат Тотубаева билдирди.
Анын айтымында, турак жай комплексинде үч деңгээлдүү жер алдындагы унаа токтотмо болот. Мындан тышкары, спорт аянтчалары, балдар аянтчалары – кыскасы, ыңгайлуу жашоо үчүн керектүү бардык шарттар каралган.
“Көпчүлүк жарандарыбыз “Бишкек шаарында мындай бийик имараттарды курууга болобу?” – деген суроо берип жатышат. Биз ишенимдүү айта алабыз: бул комплекс толугу менен сейсмологиялык стандарттарга жооп берет. Бардык эсептөөлөр, конструкциялар жана коопсуздук нормалары бирдиктүү талаптарга ылайык аткарылган.
Демек, жарандар өз коопсуздугу үчүн тынчсызданбашы керек. Жалпысынан биздин курулуп жаткан үйлөрдүн сапаты бир нече этаптан турган текшерүүдөн өтөт. МИКтин өзүнүн курулуш бөлүмү бар жана алар дайыма курулуштун сапатына көзөмөл жүргүзүп турушат”, — деди ал.
