МинКаб камсыздандыруу компанияларынын өз алдынча жоюлуу тартибин бекитти
МинКаб ыктыярдуу негизде камсыздандыруу (кайра камсыздандыруу) уюмун жоюуга же кайра уюштурууга макулдук берүү тартибин бекитти. Тиешелүү токтом 2025-жылдын 25-ноябрында № 757 саны менен кабыл алынган.
Токтом расмий жарыяланган күндөн (2025-жылдын 28-ноябрындагы "Эркин Тоо" гезити, № 94) тартып 15 күн өткөндөн кийин күчүнө кирет.
Бекитилген тартипке ылайык, ыйгарым укуктуу органдын макулдугусуз камсыздандыруу/кайра камсыздандыруу уюмдарын жоюуга же кайра уюштурууга жол берилбейт. Компания макулдук алуу үчүн өзүнүн камсыздандыруу портфелин тиешелүү камсыздандыруу боюнча лицензиясы бар башка камсыздандыруу уюмдарына өткөрүп бергенден кийин кайрыла алат.
Макулдук алуу үчүн уюм төмөнкү документтер менен катар арыз бериши керек:
- Акционерлердин жалпы жыйынынын чечими;
- Жоюу/кайра уюштуруунун мөөнөттөрү жана этаптары көрсөтүлгөн планы;
- Акыркы отчеттук мезгил үчүн аудитордук корутунду;
- Салык органы менен салыштыруу актысы;
- Камсыздандыруучулар жана кредиторлор алдындагы милдеттенмелердин аткарылышы тууралуу маалымат;
- Арыз берген күндөгү каржылык отчеттуулук;
- Камсыздандыруу портфелин өткөрүү боюнча келишим;
- Лицензиянын (лицензиялардын) оригиналы.
Карап чыгуу мөөнөттөрү
Ыйгарым укуктуу орган:
- документтердин толуктугун 3 иш күнүнүн ичинде текшерет;
- толук пакет алынган күндөн тартып 30 иш күнүнөн ашпаган мөөнөттө карайт.
Ошондой эле ыйгарым укуктуу органга өткөрүп берүүчү жана кабыл алуучу уюмдардын каржылык туруктуулугун баалоо, лицензиялык талаптардын сакталышын текшерүү укугу берилет.
Баш тартуунун негиздери
Баш тартууга негиз болуучу жагдайлар төмөнкүлөр:
- толук эмес же туура эмес маалымат берүү;
- камсыздандыруучуларга же кредиторлорго карата аткарылбаган милдеттенмелердин болушу;
- жарандык мыйзамдар талаптарынын бузулушу;
- уюмга карата көзөмөл чаралары колдонулуп жатканы;
- портфелди кабыл алуучу тараптын каржылык туруксуздугу.
