Орок, Сарбан, Кашка-Баш, Жал айылындагы мораторий киргизилген жерлерге компенсация төлөнөт
Бишкектин бир катар калктуу конуштарынын тургундары өздөрүнө таандык айыл чарба багытындагы жер тилкелеринин тагдырына тынчсызданып жатышканын депутат Жаныбек Абиров ЖК комитеттеринин жыйынында билдирди.
Анын айтымында, административдик-аймактык реформа жүргүзүлүп жаткан шартта жогорку зонадагы — Орок, Сарбан, Кашка-Баш, Жал аймактарында жашаган 1,5 миңге жакын тургун мораторий салынган жер тилкелеринин келечеги кандай болоруна кызыгып жатышат.
Министрлер кабинетинин төрагасы Адылбек Касымалиев бул жер тилкелеринин тагдыры учурда каралып жаткан жана бекитиле турган башкы планды эске алуу менен чечилерин билдирди.
"Алар жерин сата алабы же багытын өзгөртө алабы?" — деп тактады депутат. "Эгерде биз жерлерди алып койсок, сөзсүз түрдө компенсация төлөнөт", — деди өкмөт башчысы.
Ошондой эле Жаныбек Абиров дача конуштарында жашаган тургундарды ичүүчү суу менен камсыздоого көмөк көрсөтүүнү суранды. Анын айтымында, айрымдар сууну бөтөлкө менен ташып ичүүгө аргасыз болууда.
Буга Суу ресурстары министри Бакыт Торобаев: "Биз даярбыз, болгону тиешелүү документтерди беришсе болду", — деп жооп берди.
