Кыргызстанда келечекте медициналык шаарча курулушу мүмкүн
МинКаб төрагасы Адылбек Касымалиев бүгүн Жогорку Кеңештин жыйынында саламаттык сактоо тармагына 2024-жылы мамлекеттик бюджеттен 36 млрд 300 млн сом жумшалганын билдирди.
Анын айтымында, республикалык бюджеттен бөлүнгөн 781,9 млн сомго 5 ири медициналык объект курулуп, аймактарда медициналык кызмат көрсөтүүнүн жеткиликтүүлүгү кеңейген.
" Учурда 11,7 млрд сом каражатка 39 медициналык мекеме курулушу жүрүп жатат. 2025-жылы капиталдык салымдар боюнча 450,5 млн сом бөлүнүп, 27 саламаттык сактоо объектиси толук бүткөрүлдү. 249 орундуу жаңы перинаталдык борборлордун курулушу башталды. Быйыл 391 млн сомго 162 медициналык жабдуу сатып алынган. Жүрөк жана ички органдарды текшерүүгө арналган 17 УДИ аппараты аймактарга жеткирилди", - деди төрага.
"Биздин планда медициналык шаарча куруу жана көп тармактуу мамлекеттик саламаттык сактоо уюмдарын бириктирген заманбап медициналык хаб түзүү бар. Жакынкы убакытта бул ишти толук кандуу баштайбыз", - деп кошумчалады ал.
