Майлуу-Суу лампа заводунун кызматкерлери өлкө жетекчилигине кайрылышты
Жалал-Абад облусундагы Майлуу-Суу лампа заводунун айрым жумушчулары ишканадагы соңку абалга байланыштуу президент Садыр Жапаров баштаган бийлик башчыларына кайрылганын "Азаттык" жазды.
Анда заводдун иши жүрбөй жатканын, акыркы үч айдан бери айлык алыша электигин, кыскартуу башталганын, азыркы жетекчилери аларды өз эрки менен иштен кетүүгө мажбулап жатышканын айтып чыгышты.
"Майлуу-Суу шаарындагы эң чоң лампа завод акыркы эки жылдан бери аксап, жакшы иштей албай келатат. Аты эле иш болуп жатат, бир жумада үч күн иштеп, төрт күн дем алабыз. Биз акыркы үч айдын айлыгын ала элекпиз. Айлыктан мурда бизди заводдун тагдыры ойлондуруп жатат. Ушунча адам кайда барабыз? Чакан завод болсо дагы макул эле. Ар келген директор иштейбиз дейт, иштебей эле артка кетип жатабыз.Силерден сураныч, ушул жакка келип жыйын өткөрүп, элге ачыгын айтсаңар. Азыр бизге шарт коюп коюшту, июлга чейин күтөсүңөр, инвестор келип калышы мүмкүн, болбосо азыр эсеп-кысабын алып кете бергиле деп айтышты. Азыр арыз жазсаңар айлыгыңарды беребиз, жазбасаңар айлык жок деп жатышат",-деди чогулгандардын бири.
Эске салсак, Майлуу-Суу лампа заводуна байланыштуу маселе Элдик курултайда да көтөрүлүп Президент Садыр Жапаров: "Жакында эле бир миллиард сом бердик. Биз "ушуну өлтүрбөй жандандырып, тирилтип, өнүктүрүп кеткиле" деп айттык. Мамлекеттик компаниялар өзү жакшы иштечү эмес да, банкрот кылып туруп жеке менчикке сатылып кетчү. Биз болсо, тескерисинче, кайра жандандырып жатабыз. Кудай буюрса иштеп кетет го деп ойлойбуз, бир миллиард сом менен иштете албаса анда ал өлүк жетекчи болот",-деген Жапаров.
