"Дөөлөт курулуш" компаниясынын бир топ алешемдиктери аныкталды
Президенттин Иш башкармалыгынын башчысы Каныбек Туманбаев президенттин тапшырмасы менен Шопоков шаарындагы "Дөөлөт курулуш" компаниясынын курулуш объекттеринин абалын жеринен текшергенин "Кабар" жазды.
Текшерүүнүн жүрүшүндө миңден ашуун үлүштүк курулушка катышуучулар (дольщиктер) аталган компанияга ишенип, 1 млрд сомдон ашык каражат төлөшкөнү маалым болду. Айрымдары кийинчерээк каражаттарын кайра алып кеткенине карабастан, компаниянын эсептеринде үлүш ээлеринин акчасынан 900 млн сомдон ашык сумма калууга тийиш экени айтылган.
Ошол эле учурда курулуш иштери дээрлик жүргүзүлгөн эмес. Көпчүлүк блоктор котлован деңгээлинде калып, айрым участоктордо бир да кабат көтөрүлгөн эмес.
Белгиленгендей Шопоков шаарынын мэриясы компанияга ири жер тилкесин бөлүп берген. Маалыматка ылайык, жер тилкесинин аянты 8 гектардан ашык. Кезегинде компания 140 батирди шаардык мэриянын балансына өткөрүп берүүгө милдеттенме алган. Бирок, бүгүнкү күнгө чейин бул талаптардын аткарылышы боюнча реалдуу жыйынтык жок.
Ушуга байланыштуу жарандардын ишеними жана каражаты менен мындай жоопкерчиликсиз мамиле кылууга жол берилбестиги белгиленди.
