Кесиптик бирликтер акчаларына эс алуучу корпустар курулуп жатат
Мүчөлөрдөн чогулган каражаттар натыйжалуу пайдаланууга өткөнү мүлккө байланышкан маселелер туура чечилип жатканын “Кабар” агенттигинде өткөн маалымат жыйынында Кесиптик бирликтер федерациясынын төрагасы Мурадил Жумадилде билдирди.
“Советтер союзу кулап, кесиптик бирликтер пансионаттарды бөлүштүрүп алганда, Кыргызстанга 217 эс алуучу жай өткөн. Бүгүнкү күндө ошолордун 101и объектиси сатылып кеткен. Учурда алар боюнча 108 сот иши жүрүп жатат. Бизге өткөн 5 объектинин ижарасынан түшкөн каражат бүгүнкү күндө 71%га өстү. Алар айлык акыга жумшалууда.
Жолдомолорго президент тарабынан мораторий коюлгандыктан, ал каражаттар эс алуу жайларын оңдоп-түзөө иштерине кетүүдө. Ал эми мүчөлөрдөн чогултулган 1% каражаттар жумушчулардын жана алардын балдарынын эс алуусуна жумшалууда. Өткөн жылы тармактык комитеттер 96 млн сомго 37 миң адамды эс алдырган”,-деди ал.
Төраганын айтымында эки жылдык реформалардын негизинде кесиптик бирликтерге 1С системасы киргизилди.
“Система аркылуу толук кандуу эсеп саясаты жүрүүдө. Учурда мүчөлөрдөн канча акча келип жатканы, канча акча кайда жумшалып жатканы тууралуу комитеттин ар бир төрагасы айтып бере алат.
Мисалы, Агартуу системасында 170 миң мүчө бар. Алардан чогулткан 55 млн сомго “Кызыл гвоздика” пансионатында мугалимдер үчүн корпус курулууда. Мындай көрүнүш өлкөнүн эгемендүүлүгүндө биринчи жолу болуп жатат.
Ошондой эле саламаттык сактоо тармагынын комитети былтыр 22 млн сом чогултуп, быйылкы жылы ал сумманы 40 млн жеткирүүнү пландап жатат. Алдыда бул каражатка балдардын “Ден соолук” лагерине 40 кишилик корпус курулат. Булар жалпы мүчөлөрдүн каражатына курулуп жаткан имараттар”,-деп кошумчалады ал.
