Үч эмдүү үй-бүлөгө эки бөлмөлүү батир берилди

Таластагы үч эм төрөлгөн үй-бүлөгө Бишкек шаарынын борборунан эки бөлмөлүү батирдинберилгенин УКМКнын басма сөз кызматы билдирди.

Буга чейин ЖМКлар Рыскул Сыргабаев менен Медина Калиеванын кайрылуусун жарыялаган. Анда жаш жубайлар турак жай жана документ маселесин чечүүгө көмөк көрсөтүүнү суранышкан. 2024-жылдын ноябрь айынан бери алар борбор калаада ижарага алынган батирде жашап келишкен. Рыскул Сыргабаев курулуш объекттеринде жумушчу болуп иштейт.

Алардын айтымында, 2025-жылдын 5-июлунда Бишкек шаарынын мэриясына турак жай шарттарын жакшыртуу боюнча жардам сурап кайрылышкан. Бирок шаарда каттоосу жок болгондугуна байланыштуу аларга баш тартылган.

УКМК белгилегендей, үч эмдин төрөлүшүн эске алуу менен, ошондой эле өлкөдө демографиялык өсүштү колдоо максатында, УКМКнын төрагасы Камчыбек Ташиев үй-бүлөгө эки бөлмөлүү батирдин ачкычын жеке өзү тапшырды.