Кыргызстан ЕАЭБдеги өлкөлөрдүн ичинен турак жайларды пайдаланууга берүү боюнча 2-орунда турат

2025-жылдын январь–ноябрь айларынын жыйынтыгы боюнча Кыргызстанда 1 млн 491,4 миң чарчы метр турак жай пайдаланууга берилди.

Бул көрсөткүч 2024-жылдын ушул эле мезгилине салыштырмалуу 31,4%га жогору болгонун Евразия экономикалык биримдигинин (ЕАЭБ) статистика департаментинин маалыматы күбөлөндүрөт.

Кыргызстандагы өсүш Биримдикке мүчө өлкөлөрдүн ичиндеги эң байкаларлыктардын бири болду. Мындан жогору көрсөткүч бир гана Арменияда катталып, анда турак жайды пайдаланууга берүү 73,2%га өскөн. Салыштыруу үчүн айтсак, Беларусь өлкөсүндө бул көрсөткүч 7,8%га, Казакстанда 3,9%га өскөн, ал эми Россияда турак жай курулушунун көлөмү 2,4%га азайган.

Жалпысынан алганда, ЕАЭБ өлкөлөрүндө 2025-жылдын январь–ноябрь айларында пайдаланууга берилген турак жайдын жалпы көлөмү 115 млн 158,7 миң чарчы метрди түзүп, бул 2024-жылдын ушул эле мезгилине салыштырмалуу 0,3%га аз болду. Бул төмөндөө негизинен Россиядагы көрсөткүчтүн кыскарышы менен байланыштуу.